Sunday, February 25, 2007

اهم من الدروس

بسم الله الرحمن الرحيم
اول شيء مهم بالنسبة للجميع هو معرفة مكونات الجمله في اللغه الانجليزيه
اولا انواع الجمله
جمله بسيطه
جمله مركبه
اولا الجمله البسيطه وتتكون من فاعل وفعل
ويمكن ان تتكون من فعل فقط مثل
Mona is eating.
فهذه الجمله دلت علي ان مني بتاكل وليس من الضروري ان نعرف ماذا تأكل حيث ان الجمله اعطت معني
Stand up.
وهذه الجمله تتكون من فعل فقط حيث انها جمله امريه وقد افادت معني واضح
اما الجمله المركبه فهي تتكون من فاعل وفعل ومفعول به ويمكن ان تكون اكثر من ذلك حيث يمكن ربط جملتين بأداة ربط مثل
Mona was watching TV when Ali came.
فهاتين جملتين منفصلتين كالاتي
Mona was watching TV.
Ali came
وهكذا عرفنا ان هناك نوعين من الجمله وهما البسيطه والمركبه
طيب اثناء الكلام احنا قلنا كام حاجه مش مفهومين زي الفاعل والفعل والمفعول فلازم نعرف ايه معني الكلامات دي وايه اصلها
اولا الفاعل وزي ما هو معروف الفاعل هو الشخص او الشيء الذي يقوم بفعل الفعل زي اللغه العربيه بالظبط وبالانجليزي اسمه
Subject
طيب تاني حاجه الفعل وبرضه ده كلام ساهل الفعل هو كل ما قام به الفاعل من افعال ومعناه بالانجليزي
Verb
طيب تالت حاجه هي المفعول به وهو كل من وقع عليه فعل الفاعل وبرضه له معني بالانجليزي اشمعني هو يعني
Object
طيب فاضل كمان الرابط وهي انواع مختلفه يتكتب فيها كتب كتير وسوف ياتي وقتها بالشرح تابعا
طيب نمسكهم من الاول ( الفاعل) وهو يأتي في بداية الجمله في اغلب الاحيان لانه مهم ونتفق علي حاجه من دلوقتي المهم بيكون فين .........اه في الاول اوك
طيب هو ايه الاشكال اللي ممكن يكون عليها الفاعل اصل احنا بنشوف احيانا ضمير واحيانا اخري مفيش ضمير خالص ساعات بيكون اسم زي علي ومني اللي هاقرفكم بيهم واحيانا مدرسه وولد ومدرس ...الخ
طيب والحل يعني كل اللي ييجي في اول الجمله فاعل ....غالبا ايوه اللي ييجي في اول الجمله فاعل ماعدا بعض الحاجات اللي هاقولكم عليها ان شاء الله في وقتها ....طيب وبعدين مش فاهمين حاجه برضه عايزين نعرف ايه هو الفاعل وايه اشكاله بالترتيب علشان نعرف ...اقولكم انا الفاعل ممكن يكون علي الاشكال الاتيه
اولا اسم عاقل زي محمد ومحمد وبيتر وبيشوي وجوزيف ومني وكل الاسماء اللي ممكن تقابلوها في حياتكم ...دي اول حاجه
طيب وايه تاني حاجه
ثانيا ممكن يكون فاعل الجمله هو الضمير بتاع الفاعل وده بيسموه "ضمير فاعل" طيب يا مستر زي ايه الضمائر دي؟
لازم اننا نعرف ان احنا في الانجليزي زمتنا واسعه شويه كل الناس عندها ضمير واحنا عندنا سبعه وممكن نقول انهم تمانيه بس المهم نفهم ازاي الكلام ده وهم بالترتيب كالاتي
I
He
She
It
They
We
You
الله دول سبعه بس يا مستر ايه الحكايه ...؟ اقولك انا الحكايه اصل فيه واحد منهم باتنين اللي هو المعلم
You
وده بيحل محل ضمير المخاطب المفرد والجمع ولكن يعامل معامله الجمع برضه يعني ايه؟ معلش
لو قلنا انا بكلم ولد واحد بالانجليزي طبعا هاقوله ايه؟
You.....a good student.
هنا هناخد ايه؟
(is) or (are) ?
طبعا المفروض ان ده ولد واحد واللي نعرفه ان المفرد بياخد الاولانيه
(is)
ولا ايه رأيكم طبعا الكلام ده غلط لأننا اتفقنا ان ضمير الفعل وهو
you
بيعامل معاملة الجمع حتي لو كان الفاعل مفرد
كفايه لغاية هنا هاروح اعمل شاي وابقي ارجع بعد شويه اكمل سلام
...........................
شربنا الشاي واتعشينا وكله تمام وادينا رجعنا من تاني
يلا نكمل
المهم زي ما كلنا عارفين ضمائر الفاعل والاسماء بتاعة الاشخاص ممكن تدخل كفاعل اساسي للجمله طيب فيه حاجات تاني ممكن تكون فاعل للجمله غير اسماء العلم والاماكن والاشياء .....الخ
اه ممكن بس حاجات صغيره زي ممكن نقول
My friend
هنا الكلمتين مكونين من صفه وموصوف الصفه وهي صفة الملكيه
my
اما الاسم الموصوف فهو
friend
يعني ممكن صفه تيجي في اول الجمله اه ممكن........المهم خلينا في اللي بعده علشان الحاجات دي شرحها ليكم في البدايه ممكن مايكونشي حلو عليكم
طيب بعد الفاعل ييجي ايه يا شطار..............الفعل
Verb
وده من غيره ما ينفعش نعمل جمله
والفعل انواع كتيره وهي
الفعل الاساسي وهو اساس الجمله بدونه لا توجد جمله حيث انه مالم يوجد فعل لا يوحد كلام والكلام احنا في الانجليزي بنسميه جمله اذ يبقي مافيش جمله من اساسه تمام؟
الفعل اساسي نوعي فعل عادي وفعل شاذ
طيب ايه هي الافعال العاديه
قالك يا سيدي ولا سيدك الا انا ان الفعل العادي هو كل فعل يقبل اضافه
d or ed
الي نهايته عند تصريفه في صيغة الماضي والتصريف الثالث
طيب امال ايه الفعل الشاذ قالك هو الفعل الذي لا يقبل اضافه
d or ed
وده له اشكال مختلفه موجوده في ملف علي الرابط ده اللي فيه ملف فلاش لامم كل الافعال الشاذه في اللغه الانجليزيه وعاملهم في مجموعات حسب شكل الفعل في التصريفات التلاته
والملف ده عامله مدرس زميلنا
وكل ما عليك الا انك تضغط علي الرابط وتحفظه عندك او ان تتفرج عليه من علي الموقع ..........تمام؟
طيب وبعد اسبوع رجعنا من تاني نكمل موضوعنا...يلا نبدأ
وبعد ما وصلنا للفعل وعرفنا اللي عرفناه عن الفعل العادي والشاذ نمسك الفعل العادي الاول
وهو ثلاث اقسام
الاول الفعل الاساسي
الفعل المساعد
الفعل الناقص
والفعل الاساسي هو اهم ما في الجمله وبدونه لا توجد جمله لانه كما قلنا سابقا ان ما لم توجد افعال لا يوجد كلام وهو الجمله وبالتالي لا يمكن تكوين جمله بدون فعل اساسي والافعال الاساسيه مثل
work
study
play
watch
المقصود من الكلام ان الافعال دي بدونها لا يمكن ان نكمل جمله مفيده في المعني طيب الكلام ده مش مظبوط يا مستر لأننا بنقول مثلا
Ali is my friend.
تمام والفعل المساعد هنا هو
verb to be
وهناك ايضا فعلان يمكن استخدامهما كأفعال اساسيه وهم
verb to have
verb to do
وهذه الافعال الثلاثه وجميع تصريفاتها اذا جاءت في جمله بدون فعل اساسي فهذا يعني انها هي الفعل الاساسي مثل
I have my breakfast at seven.
I do my homework, everyday.
المقصود هنا انه ايضا يمكننا ان نقول ان الافعال الاساسيه هي كل افعال اللغة الانجليزيه ماعدا الافعال الناقصه حيث انها "ليس كلها" لايمكن استخدامها كأفعال اساسيه اي لا يمكن ان تكون لوحدها في الجمله
طيب ثانيا الافعال المساعده هي ايه هي بالضبط
verb to be
verb to have
verb to do
will
would
can
could
shall
should
may
might
must
ought to
have to
need to
وان كنا نسينا حد ممكن نقول ان كل الافعال الناقصه يمكن ان تستخدم في الجمله كأفعال مساعده وذلك عندما تدخل في تكوين الازمنه
واخيرا الافعال الناقصه وهي
will
would
can
could
shall
should
may
might
must
ought to
have to
need to
و هي افعال تسخدم ليس كأفعال لا اساسيه ولا مساعده وهنا فإننا نستخدمها في المواقف الخاصه اي المواقف التي يمكن ان تكون لها معني خاص وذلك في المواقع الخاصه مثل اسلوب الطلب والاستفسار والاقتراح وطلب المساعده وعرض المساعده ....الخ
ومن هنا نبدأ بشرح وتفسير استخدام انواع الافعال
كما قلنا في البدايه الافعال الاساسيه تستخدم في بناية الجمل
طيب امتي ممكن نستخدم الافعال الاساسيه فقط في الجمله
ده بيكون خلال زمنين اساسين في اللغة الانجليزيه وان كان هما الزمنين الاصليين في اللغة الانجليزيه بمعني ان اللغة الانجليزيه ليس بها ازمنه اساسيه الا اتنين فقط وهما
زمن المضارع البسيط
وزمن الماضي البسيط
وسوف نتناولهم بالشرح بالتفصيل

1 comment:

Anonymous said...

الله ينور عليك يا باشا